ക്രൈസ്തവർക്കെതിരായുള്ള അക്രമങ്ങളിൽ ആശങ്ക അറിയിച്ച് രാഷ്ട്രപതി

_{ക്രൈസ്തവ സഭാ/സംഘടനാ പ്രതിനിധികൾ രാഷ്ട്രപതിയോടൊപ്പം}

ന്യൂഡൽഹി: ഇന്ത്യയിൽ ക്രൈസ്തവർക്കെതിരായി നടക്കുന്ന അക്രമങ്ങളിൽ ആശങ്ക അറിയിച്ച് പ്രസിഡന്റ് ദ്രൗപതി മുർമു. ക്രിസ്ത്യാനികൾക്കെതിരായ വർദ്ധിച്ചുവരുന്ന പീഡനങ്ങളെക്കുറിച്ചുള്ള റിപ്പോർട്ടുകളിൽ ഉത്കണ്ഠ രേഖപ്പെടുത്തുകയും ഭരണഘടനാപരമായ പരമോന്നത അധികാരി എന്ന നിലയിൽ നടപടിയെടുക്കുമെന്ന് തന്നെ സന്ദർശിച്ച ക്രിസ്ത്യൻ സഭാ/സംഘടനാ പ്രതിനിധികൾക്കു ഉറപ്പുനൽകുകയും ചെയ്തു. ഏപ്രിൽ 13 ന് ന്യൂഡൽഹിയിലെ തന്റെ ഔദ്യോഗിക വസതിയായ രാഷ്ട്രപതി ഭവനിൽ ക്രിസ്ത്യൻ നേതാക്കളുടെ ഒരു പ്രതിനിധി സംഘത്തെ മുർമു സ്വീകരിക്കുകയും തുടർന്ന് അവരുമായി നടത്തിയ കൂടിക്കാഴ്ചയിലാണ് രാഷ്ട്രപതി തന്റെ ആശങ്ക പങ്കു വച്ചത്. ഡൽഹി ആർച്ച് ബിഷപ്പ് അനിൽ ജോസഫ് കൂട്ടോയുടെ നേതൃത്വത്തിൽ, മെത്തഡിസ്റ്റ് ബിഷപ്പ് സുബോധ് മൊണ്ടൽ, ചർച്ച് ഓഫ് നോർത്ത് ഇന്ത്യയിലെ പ്രൊട്ടസ്റ്റന്റ് ബിഷപ്പ് പോൾ സ്വരൂപ്, ക്രിസ്ത്യൻ പ്രവർത്തകരായ മൈക്കൽ വില്യംസ്, തെഹ് മിന അറോറ എന്നിവരായിരുന്നു രാഷ്ട്രപതിയെ സന്ദർശിച്ച സംഘാംഗങ്ങൾ. കഴിഞ്ഞ ഫെബ്രുവരി 19 ന് ന്യൂഡൽഹി ജന്തർ മന്തറിൽ 22,000 ത്തോളം വരുന്ന ക്രിസ്ത്യാനികൾ സമാധാനപരമായി നടത്തിയ പ്രതിഷേധ സമ്മേളനത്തിൽ വച്ച് പ്രസിഡന്റിനെ കാണാനും നിവേദനം സമർപ്പിക്കാനും തീരുമാനിച്ചിരുന്നതായി ക്രിസ്ത്യൻ നേതാക്കൾ പറഞ്ഞു. രാജ്യത്തുടനീളമുള്ള ക്രിസ്ത്യൻ സമൂഹത്തിന് നീതിയും സമാധാനവും ഉറപ്പാക്കാൻ സർക്കാർ ഇടപെടൽ ആവശ്യപ്പെട്ടായിരുന്നു അന്നത്തെ പ്രതിഷേധം.

അരമണിക്കൂറോളം നീണ്ട കൂടിക്കാഴ്ചയിൽ, ക്രിസ്ത്യാനികൾക്കെതിരായ അതിക്രമങ്ങൾ, പ്രത്യേകിച്ച് ഉത്തർപ്രദേശ്, ഛത്തീസ്ഗഡ് സംസ്ഥാനങ്ങളിൽ കുത്തനെ വർധിക്കുന്നതിനെക്കുറിച്ച് രാഷ്ട്രപതിയെ ധരിപ്പിച്ചു. ക്രിസ്ത്യാനികളെ ലക്ഷ്യം വച്ചുള്ള റിപ്പോർട്ടുകൾ താൻ വായിച്ചിട്ടുണ്ടെന്നും എന്നാൽ, ഈ ആക്രമണങ്ങൾ നടത്തിയത് വിരലിലെണ്ണാവുന്ന ആളുകൾ മാത്രമാണെന്നാണ് താൻ വിശ്വസിക്കുന്നതെന്നും മതേതര ആശയം ചൂണ്ടിക്കാട്ടി മുർമു പറഞ്ഞു. സ്വന്തം സംസ്ഥാനമായ ഒഡീഷയിൽ കന്യാസ്ത്രീകൾക്കൊപ്പം സന്നദ്ധസേവനം നടത്തിയ സമയം അവർ സ്നേഹപൂർവ്വം അനുസ്മരിച്ചു, അതുപോലെ ക്രൂരമായി കൊലചെയ്യപ്പെട്ട ഓസ്ട്രേലിയൻ മിഷനറി ഗ്രഹാം സ്റ്റെയിൻസിന്റെയും രണ്ടു കുട്ടികളുടെയും ദാരുണമായ നഷ്ടവും അവർ അനുസ്മരിച്ചു. സ്റ്റെയിൻസിന്റെ കുടുംബം തന്റെ അയൽക്കാരാണെന്നും ആ ദുരന്തം ഒഴിവാക്കാൻ ആ സമയത്ത് കഴിയാതെ പോയതിൽ ഖേദം പ്രകടിപ്പിക്കുന്നതായും പ്രസിഡന്റ് പറഞ്ഞു. ഇന്ത്യയിൽ ക്രിസ്ത്യാനികൾക്കെതിരായ അതിക്രമങ്ങൾ നിരീക്ഷിക്കുന്ന യുണൈറ്റഡ് ക്രിസ്ത്യൻ ഫോറം (യുസിഎഫ്) ക്രിസ്ത്യാനികൾക്കെതിരെ 598 അക്രമ സംഭവങ്ങൾ രേഖപ്പെടുത്തിയിട്ടുണ്ട്. 2022-ൽ രാജ്യത്തെ 28 സംസ്ഥാനങ്ങളിൽ നിന്നും 8 ഫെഡറൽ ഭരണ പ്രദേശങ്ങളിൽ നിന്നും 21 സംസ്ഥാനങ്ങളിൽ നിന്ന്, രാഷ്ട്രപതിക്ക് സമർപ്പിച്ച മെമ്മോറാണ്ടത്തിൽ പറയുന്നു. 2023-ന്റെ ആദ്യ മൂന്ന് മാസങ്ങളിൽ, ക്രിസ്ത്യാനികൾക്കെതിരായ വിശ്വാസാധിഷ്ഠിത അക്രമത്തിന്റെ 187 സ്ഥിരീകരിച്ച സംഭവങ്ങൾ UCF റിപ്പോർട്ട് ചെയ്തിട്ടുണ്ട്. അക്രമ സംഭവങ്ങളിൽ ഭീഷണിപ്പെടുത്തൽ, ആൾക്കൂട്ട അക്രമം, ക്രൂരമായ ആക്രമണം, വിശുദ്ധ ആരാധനാലയങ്ങൾ നശിപ്പിക്കൽ, ലൈംഗിക അതിക്രമം, പള്ളികൾ അടച്ചുപൂട്ടൽ, ശവസംസ്കാരം നിഷേധിക്കൽ എന്നിവ ഉൾപ്പെടുന്നു. ഉത്തർപ്രദേശ്, ഛത്തീസ്ഗഡ്, മധ്യപ്രദേശ്, തമിഴ്നാട്, ഉത്തരാഖണ്ഡ്, കർണാടക, ജാർഖണ്ഡ് എന്നിവയാണ് പ്രത്യേക ശ്രദ്ധാകേന്ദ്രമായ സംസ്ഥാനങ്ങൾ. മധ്യ ഇന്ത്യൻ സംസ്ഥാനമായ ഛത്തീസ്ഗഡിലെ ഗോത്രവർഗ ആധിപത്യമുള്ള തെക്കൻ പ്രദേശമായ ബസ്തറിൽ, ഗോത്രവർഗ ക്രിസ്ത്യാനികൾക്ക് നേരെയുള്ള ആരോപണങ്ങളുടെ പേരിൽ അടുത്തിടെ നടന്ന ആക്രമണ പരമ്പരകൾ മെമ്മോറാണ്ടത്തിൽ എടുത്തു പറയുന്നു. ക്രിസ്ത്യൻ സമൂഹത്തിന്റെ ഭരണഘടനാപരമായ അവകാശങ്ങൾ, വിശ്വാസം ആചരിക്കാനും പ്രചരിപ്പിക്കാനുമുള്ള സ്വാതന്ത്ര്യം, അന്തസ്സോടെയും വിവേകത്തോടെയും ജീവിക്കാൻ ഫെഡറൽ, സംസ്ഥാന സർക്കാരുകളോട് മെമ്മോറാണ്ടം ആവശ്യപ്പെട്ടു. മനുഷ്യാവകാശ നിരീക്ഷണ സംവിധാനങ്ങൾ ശക്തിപ്പെടുത്താനും ന്യൂനപക്ഷങ്ങൾക്കെതിരെയുള്ള ടാർഗെറ്റ് അക്രമങ്ങളെ നേരിടാൻ ദേശീയ-സംസ്ഥാന പരിഹാര സംവിധാനങ്ങൾ സ്ഥാപിക്കാനും ആവശ്യപ്പെടുന്നു. ക്രിസ്ത്യാനികൾക്കെതിരായ കള്ളക്കേസുകൾ വേഗത്തിൽ അവസാനിപ്പിക്കുക, രാജ്യത്തുടനീളം അനധികൃതമായി തകർത്ത പള്ളികളുടെ പുനർനിർമ്മാണം, വിജിലൻസ് ആൾക്കൂട്ടങ്ങൾക്കെതിരെ കർശന നടപടി, നഷ്ടപരിഹാരം എന്നിവയും പ്രതിനിധികൾ ആവശ്യപ്പെട്ടു. മുർമു, പ്രതിനിധി സംഘത്തെ ക്ഷമയോടെ കേൾക്കുകയും ആരോഗ്യ സംരക്ഷണത്തിലും വിദ്യാഭ്യാസ മേഖലയിലും ക്രിസ്ത്യൻ സമൂഹത്തിന്റെ സേവനത്തെ അഭിനന്ദിക്കുകയും ചെയ്തു.